ಏಕಕಾಲಕ್ಕೆ ಎರಡು ಕಂಗಳಲ್ಲಿ ನೋಡುವ ದೂರದರ್ಶಕ ಆವಿಷ್ಕಾರ!

ಉಡುಪಿ: ಮಣಿಪಾಲ ಎಂಐಟಿಯ ಉದ್ಯೋಗಿ, ಪರ್ಕಳದ ನಿವಾಸಿ ಸಂಶೋಧಕ ಆರ್.ಮನೋಹರ್ ತನ್ನದೇ ಸೂತ್ರ ಬಳಸಿ ಏಕಕಾಲಕ್ಕೆ ಎರಡು ಕಣ್ಣುಗಳಲ್ಲಿ ನೇರವಾಗಿ ಆಕಾಶದಲ್ಲಿ ಗ್ರಹಗಳನ್ನು ನೋಡುವಂತಹ ದೂರದರ್ಶಕವನ್ನು ಆವಿಷ್ಕರಿಸಿದ್ದಾರೆ. ಇದೊಂದು ದೂರದರ್ಶಕದ ಆವಿ ಷ್ಕರಣೆಯಲ್ಲಿ ಹೊಸ ಮೈಲುಗಲ್ಲು ಎನ್ನ ಲಾಗುತ್ತಿದೆ.

ಇವರು ಈಗಾಗಲೇ ರಾಷ್ಟ್ರೀಯ ಮತ್ತು ಅಂತರ್‌ರಾಷ್ಟ್ರೀಯ ಮಟ್ಟದಲ್ಲಿ ಪೇಟೆಂಟ್ ಪಡೆದು ಒಂದು ಕಣ್ಣಿನಲ್ಲಿ ನೇರವಾಗಿ ನೋಡುವ ದೂರದರ್ಶಕವನ್ನು ಆವಿಷ್ಕರಿಸಿದ ಜಗತ್ತಿನ ಒಂಭತ್ತು ಸಾಧಕರಲ್ಲಿ ಒಬ್ಬರಾಗಿದ್ದಾರೆ. ಇದೀಗ ಈ ಹೊಸ ಆವಿಷ್ಕಾರದ ಮೂಲಕ ಆರ್.ಮನೋಹರ್‌ರ ಸಾಧನೆಯ ಮುಕುಟಕ್ಕೆ ಮತ್ತೊಂದು ಗರಿ ಸೇರ್ಪಡೆಯಾಗಿದೆ.

‘‘ಈ ದೂರದರ್ಶಕವು ಸುಮಾರು 80 ಎಕ್ಸ್ ದೂರದ ವಸ್ತುಗಳನ್ನು ಕಾಣುವ ತಂತ್ರಜ್ಞಾನ ಹೊಂದಿದ್ದು, ಚಂದ್ರನನ್ನು ಮನಮೋಹಕನಾಗಿ ವೀಕ್ಷಿಸಲು ಇದರಿಂದ ಸಾಧ್ಯವಾಗುತ್ತದೆ. ಈ ನವೀಕರಿಸಲ್ಪಟ್ಟ ದೂರದರ್ಶಕ ಎಚ್‌ಡಿ ಕ್ವಾಲಿಟಿಯನ್ನು ಹೊಂದಿದೆ. ಮಾರುಕಟ್ಟೆಯಲ್ಲಿ ಸಿಗುವಂತಹ ದೂರದರ್ಶಕದಲ್ಲಿ ಬಾಗಿ ಒಂದು ಕಣ್ಣಿನಲ್ಲಿ ನೋಡಬೇಕಾದರೆ, ಈ ಹೊಸ ಆವಿಷ್ಕಾರದ ದೂರದರ್ಶಕದಲ್ಲಿ ಆ ಕಷ್ಟ ಇರುವುದಿಲ್ಲ. ಇಲ್ಲಿ ಬಾಗಿ ನಿಂತು ನೋಡುವ ಬದಲು ನೇರವಾಗಿ ನಿಂತು ನೋಡಬಹುದಾಗಿದೆ. ಅದಕ್ಕಾಗಿ ಬೆಳಕಿನ ಪರಿವರ್ತನೆ ಮಾಡಿ ದೂರದರ್ಶಕವನ್ನು ನಿರ್ಮಿಸಿ ಪೇಟೆಂಟ್ ಪಡೆಯಲಾಗಿದೆ’’ ಎನ್ನುತ್ತಾರೆ ಸಂಶೋಧಕ ಮನೋಹರ್.

ಈ ದೂರದರ್ಶಕದ ಮೂಲಕ ಹೋಳಿ ಹುಣ್ಣಿಮೆಯ ಚಂದ್ರ ಬಹಳ ಸುಂದರವಾಗಿ ಕಾಣುತ್ತಿದ್ದು, ಪರ್ಕಳದ ರಥೋತ್ಸವದಂದು ಸಾರ್ವಜನಿಕರಿಗೆ ವೀಕ್ಷಣೆಗೆ ಅವಕಾಶ ಕಲ್ಪಿಸಲಾಗುವುದು ಎಂದು ಕಾರ್ಯಕ್ರಮ ಸಂಘಟಕ ಸಾಮಾಜಿಕ ಕಾರ್ಯಕರ್ತ ಗಣೇಶ್‌ರಾಜ್ ಸರಳಬೆಟ್ಟು ತಿಳಿಸಿದ್ದಾರೆ.

ಅಯೋಧ್ಯೆ ರಾಮ ಮಂದಿರದ ಭದ್ರತಾ ವ್ಯವಸ್ಥೆಗಾಗಿ ಮನೋಹರ್ ಇತ್ತೀಚೆಗೆ ಸುಮಾರು ೫೦ ದೂರದರ್ಶಕಗಳನ್ನು ಸಿದ್ಧಪಡಿಸಿ ಉತ್ತರ ಪ್ರದೇಶ ಸರಕಾರಕ್ಕೆ ಕೊಟ್ಟಿದ್ದಾರೆ.

ಅದೇರೀತಿ ದೇಶದ ರಕ್ಷಣಾ ವ್ಯವಸ್ಥೆಯಲ್ಲಿ ಇವರ ದೂರದರ್ಶಕ ಮಾನ್ಯತೆ ಪಡೆದಿರುವುದು ಇವರ ಸಾಧನೆಯ ಮೈಲುಗಲ್ಲು ಆಗಿದೆ. ಈ ದೂರದರ್ಶಕದ ಮೂಲಕ ಗ್ರಹ ಗಳನ್ನು ನೋಡುವ ಖಗೋಳ ಆಸಕ್ತರಿಗೆ ಉತ್ತಮ ಅವಕಾಶ ಕಲ್ಪಿಸಲಾಗಿದೆ.

ಎರಡು ಕಣ್ಣುಗಳಲ್ಲಿ ನೋಡುವಂತಹ ಲೆನ್ಸ್‌ಗಳು ಇತ್ತೀಚೆಗೆ ಮಾರುಕಟ್ಟೆಗೆ ಬಂದಿರುವುದರಿಂದ ನನ್ನ ಸೂತ್ರ, ಕಲ್ಪನೆ ಮತ್ತು ಪ್ರಯತ್ನಕ್ಕೆ ಇದೀಗ ಫಲ ಸಿಕ್ಕಿದೆ. ಸುಮಾರು 25 ವರ್ಷಗಳ ಸತತ ಪ್ರಯತ್ನದಿಂದ ಎರಡು ಕಣ್ಣುಗಳಲ್ಲಿ ಏಕಕಾಲದಲ್ಲಿ ನೋಡುವಂತಹ ದೂರದರ್ಶಕವನ್ನು ಸಿದ್ಧಪಡಿಸಲಾಗಿದೆ.

 ಆರ್.ಮನೋಹರ್, ಸಂಶೋಧಕ