ಸೌದಿ ಅರೆಬಿಯಾ | ಅಲ್ ಖೋಬರ್ ನ ಕಿಡ್ಸ್ ಹಟ್ ಮಾಂಟೆಸ್ಸರಿ ಸ್ಕೂಲ್ ನಲ್ಲಿ ವಾರ್ಷಿಕ ಕ್ರೀಡಾಕೂಟ

ಅಲ್ ಖೋಬರ್: ಅಲ್ ಖೋಬರ್ ನ ಅಝೀಝಿಯಾದಲ್ಲಿರುವ ಆರ್ಬಿಟ್ಸ್ ಪಯೋನಿಯರ್ಸ್ ಸ್ಪೋರ್ಟ್ಸ್ ಗ್ರೌಂಡ್ ನಲ್ಲಿ "ಟ್ವಿಂಕಲ್ ಟ್ರ್ಯಾಕ್ʼ ಎಂಬ ಶೀರ್ಷಿಕೆಯಡಿ ಕಿಡ್ಸ್ ಹಟ್ ಮಾಂಟೆಸ್ಸರಿ ಸ್ಕೂಲ್ ವತಿಯಿಂದ ವಾರ್ಷಿಕ ಕ್ರೀಡಾ ಕೂಟ ನಡೆಯಿತು.

ಕ್ರೀಡಾಕೂಟವನ್ನು ಸೌದಿ ಇಂಟರ್ನ್ಯಾಶನಲ್ ಕ್ರಿಕೆಟ್ ಟೀಮ್ ನ ಕ್ಯಾಪ್ಟನ್ ಹಿಶಾಮ್ ಶೇಖ್ ಉದ್ಘಾಟಿಸಿದರು. ಟೀಂವರ್ಕ್ ಕುರಿತ ಮಹತ್ವವನ್ನು ಒತ್ತಿ ಹೇಳಿದ ಅವರು ಮಕ್ಕಳು ಶಿಕ್ಷಣದ ಜೊತೆಗೆ ಕ್ರೀಡೆಯಲ್ಲೂ ಭಾಗವಹಿಸುವಂತೆ ಪ್ರೋತ್ಸಾಹಿಸಲು ಪೋಷಕರಿಗೆ ಕಿವಿಮಾತು ಹೇಳಿದರು.

ಈ ವೇಳೆ ಪೂರ್ವ ವಲಯ ಕ್ರಿಕೆಟ್ ಸಂಸ್ಥೆಯ ಅಧ್ಯಕ್ಷ ಇಮ್ರಾನ್ ರಶೀದ್ ಕಾರ್ಕಳ ಮಾತನಾಡಿ, ಸೌದಿ ಅಂತರಾಷ್ಟ್ರೀಯ ಕ್ರಿಕೆಟ್ ತಂಡದ ಒಳನೋಟಗಳ ಬಗ್ಗೆ ವಿವರಿಸುತ್ತಾ ಮಕ್ಕಳಿಗೆ ಸ್ಫೂರ್ತಿ ನೀಡಿದರು. ಕಾರ್ಯಕ್ರಮದಲ್ಲಿ ಅತಿಥಿಗಳಾದ ಮುಹಮ್ಮದ್ ಇಕ್ಬಾಲ್ , ಮಾಜಿ ಮುಖ್ಯೋಪಾಧ್ಯಾಯಿನಿ ತಸ್ಕೀನ್ ತಮನ್ನಾ, ಕಿಡ್ಸ್ ಹಟ್ ಪ್ರಾಂಶುಪಾಲೆ ಸಕೀನಾ ಆರಿಫ್, ಕಿಡ್ಸ್ ಹಟ್ ಅಕಾಡೆಮಿಕ್ ಕೌನ್ಸಿಲರ್ ಎ.ಎಂ. ಆರಿಫ್ ಜೋಕಟ್ಟೆ ಹಾಜರಿದ್ದು ಪ್ರೋತ್ಸಾಹಕ ಮಾತುಗಳನ್ನಾಡಿದರು.

ವಿದ್ಯಾರ್ಥಿ ಇಶಾನ್ ಅಜ್ಮಲ್ ಅವರ ಕುರ್‌ಆನ್ ಪಠಣದೊಂದಿಗೆ ಕ್ರೀಡಾಕೂಟ ಆರಂಭವಾಯಿತು. ಶಿಕ್ಷಕಿ ತಝ್ನೀಮ್ ಕಾರ್ಯಕ್ರಮ ನಿರೂಪಿಸಿದರು. ಮುಖ್ಯ ಶಿಕ್ಷಕಿ ವಿಜಿಲಾ ಸಂಜು, ಸಜ್ನಾ ಸಬೀಬ್ ಮತ್ತು ಆಶುರಾ ಸಾಥ್ ನೀಡಿದರು.

ಕಾರ್ಯಕ್ರಮದಲ್ಲಿ ವಿದ್ಯಾರ್ಥಿಗಳ ವರ್ಣರಂಜಿತ ಪಥಸಂಚಲನ,  ನೃತ್ಯ ಪ್ರದರ್ಶನ ಆಯೋಜಿಸಲಾಗಿತ್ತು. ಪುಟ್ಟ ಮಕ್ಕಳಿಗೆ ವಿವಿಧ ಕ್ರೀಡಾ ಚಟುವಟಿಕೆಗಳನ್ನು ಆಯೋಜಿಸಲಾಗಿದ್ದು, ಪ್ರಶಸ್ತಿಗಳನ್ನು ನೀಡಿ ಅಭಿನಂದಿಸಲಾಯಿತು. ಕಾರ್ಯಕ್ರಮದಲ್ಲಿ ಪುಟ್ಟ ಮಕ್ಕಳಾದ ನೈರಾ ಅಬ್ಬಾಸ್ ಮತ್ತು ಆಯಿಶಾ ಅಜ್ವಾ ಚಾಂಪಿಯನ್‌ ಗಳಾಗಿ ಹೊರಹೊಮ್ಮಿದ್ದಾರೆ.