ಆಂಧ್ರ ಕ್ರಿಕೆಟ್ ಸಂಸ್ಥೆಯ ಸಲಹೆಗಾರ್ತಿಯಾಗಿ ಮಿಥಾಲಿ ರಾಜ್ ಆಯ್ಕೆ

ಹೈದರಾಬಾದ್ : ಭಾರತದ ಮಹಿಳಾ ಕ್ರಿಕೆಟ್ ತಂಡದ ಮಾಜಿ ನಾಯಕಿ ಮಿಥಾಲಿ ರಾಜ್ ಅವರು ಆಂಧ್ರ ಕ್ರಿಕೆಟ್ ಸಂಸ್ಥೆಯ ಮಹಿಳೆಯರ ಕ್ರಿಕೆಟ್ ಕಾರ್ಯಾಚರಣೆಯ ಸಲಹೆಗಾರ್ತಿಯಾಗಿ ನೇಮಕಗೊಂಡಿದ್ದಾರೆ.

ರಾಜ್ಯದಾದ್ಯಂತ ಯುವ ಪ್ರತಿಭೆಗಳನ್ನು ಹುಡುಕುವ ನಿರ್ದಿಷ್ಟ ಉದ್ದೇಶದೊಂದಿಗೆ ಮಿಥಾಲಿ ನಮ್ಮೊಂದಿಗೆ ಮೂರು ವರ್ಷಗಳ ಒಪ್ಪಂದಕ್ಕೆ ಸಹಿ ಹಾಕಿದ್ದಾರೆ. ಮಹಿಳಾ ಕ್ರಿಕೆಟ್‌ ಗೆ ಹೊಸ ದಿಕ್ಕನ್ನು ನೀಡುವ ನಮ್ಮ ಪ್ರಯತ್ನದ ಭಾಗವಾಗಿರುವ ಈ ಜವಾಬ್ದಾರಿಯನ್ನು ಅವರು ವಹಿಸಿಕೊಂಡಿರುವುದು ನಮಗೆ ನಿಜಕ್ಕೂ ಖುಷಿ ತಂದಿದೆ ಎಂದು ಎಸಿಎ ಕಾರ್ಯದರ್ಶಿ ಎಸ್.ಸತೀಶ್ ಬಾಬು ಸ್ಪೋರ್ಟ್ಸ್‌ಸ್ಟಾರ್ ಜೊತೆಗೆ ಸಂವಾದದಲ್ಲಿ ತಿಳಿಸಿದ್ದಾರೆ.

ನಾವು ಮಹಿಳಾ ಕ್ರಿಕೆಟಿಗರಿಗಾಗಿ ಅನಂತಪುರದಲ್ಲಿ ಪೂರ್ಣ ಪ್ರಮಾಣದ ಹೈ ಪರ್ಫಾರ್ಮೆನ್ಸ್ ಅಕಾಡೆಮಿಯನ್ನು ಸ್ಥಾಪಿಸುತ್ತಿದ್ದೇವೆ. ಆರಂಭದಲ್ಲಿ ನಾವು ವಿವಿಧ ವಯೋಮಾನದ 80 ಬಾಲಕಿಯರನ್ನು ಆಯ್ಕೆ ಮಾಡುತ್ತೇವೆ. 365 ದಿನಗಳ ತರಬೇತಿಯನ್ನು ನೀಡುತ್ತೇವೆ ಎಂದು ಎಸಿಎ ಕಾರ್ಯದರ್ಶಿ ಹೇಳಿದ್ದಾರೆ.