ಡೆಲ್ಲಿ ಕ್ಯಾಪಿಟಲ್ಸ್ ಬೌಲಿಂಗ್ ಕೋಚ್ ಆಗಿ ಮುನಾಫ್ ಪಟೇಲ್ ಆಯ್ಕೆ

ಹೊಸದಿಲ್ಲಿ : ಭಾರತದ ಮಾಜಿ ಬೌಲರ್ ಮುನಾಫ್ ಪಟೇಲ್ ಅವರು 2025ರ ಋತುವಿಗಿಂತ ಮೊದಲು ಐಪಿಎಲ್ ತಂಡ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಸೇರಲಿದ್ದಾರೆ ಎಂದು ತಂಡವು ಮಂಗಳವಾರ ಖಚಿತಪಡಿಸಿದೆ.

ಭಾರತದ ಮಾಜಿ ಕ್ರಿಕೆಟಿಗರಾದ ಹೇಮಂಗ್ ಬದಾನಿ ಹಾಗೂ ವೇಣುಗೋಪಾಲ್ ರಾವ್‌ ರನ್ನು ಕ್ರಮವಾಗಿ ಮುಖ್ಯ ಕೋಚ್ ಹಾಗೂ ಕ್ರಿಕೆಟ್ ನಿರ್ದೇಶಕರನ್ನಾಗಿ ನೇಮಕ ಮಾಡಿದ್ದಾಗಿ ಕಳೆದ ತಿಂಗಳು ಡೆಲ್ಲಿ ಕ್ಯಾಪಿಟಲ್ಸ್ ಘೋಷಿಸಿತ್ತು.

ಮುನಾಫ್ ಪಟೇಲ್ ಟೆಸ್ಟ್ ಕ್ರಿಕೆಟ್‌ನಲ್ಲಿ 13 ಪಂದ್ಯಗಳಲ್ಲಿ 35 ವಿಕೆಟ್‌ ಗಳನ್ನು ಪಡೆದಿದ್ದರು. ಐಪಿಎಲ್‌ನಲ್ಲಿ ರಾಜಸ್ಥಾನ ರಾಯಲ್ಸ್(2008-10), ಮುಂಬೈ ಇಂಡಿಯನ್ಸ್(2011-13)ಹಾಗೂ ಗುಜರಾತ್ ಲಯನ್ಸ್(2017)ತಂಡಗಳನ್ನು ಪ್ರತಿನಿಧಿಸಿದ್ದ ಪಟೇಲ್ ಆ ಸಮಯದಲ್ಲಿ 65 ಪಂದ್ಯಗಳಲ್ಲಿ 76 ವಿಕೆಟ್‌ ಗಳನ್ನು ಕಬಳಿಸಿದ್ದರು.

ಈ ತಿಂಗಳು ನಡೆಯಲಿರುವ ಮೆಗಾ ಹರಾಜಿಗಿಂತ ಮೊದಲು ಡೆಲ್ಲಿ ತಂಡವು ನಾಯಕ ರಿಷಭ್ ಪಂತ್‌ ರನ್ನು ಬಿಡುಗಡೆ ಮಾಡಿ, ಕುಲದೀಪ್ ಯಾದವ್ ಹಾಗೂ ಅಕ್ಷರ್ ಪಟೇಲ್‌ರನ್ನು ಉಳಿಸಿಕೊಂಡಿದೆ.