WPL | ಯುಪಿ ವಾರಿಯರ್ಸ್ ಗೆ 162 ರನ್ ಗುರಿ ನೀಡಿದ ಮುಂಬೈ ಇಂಡಿಯನ್ಸ್

ಬೆಂಗಳೂರು : ಇಲ್ಲಿನ ಎಂ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಮಹಿಳಾ ಪ್ರೀಮಿಯರ್ ಲೀಗ್ ನಲ್ಲಿ ಮುಂಬೈ ಇಂಡಿಯನ್ಸ್ ತಂಡ ಎದುರಾಳಿ ಯುಪಿ ವಾರಿಯರ್ಸ್ ತಂಡಕ್ಕೆ 162 ರನ್ ಗಳ ಬೃಹತ್ ಮೊತ್ತದ ಸವಾಲು ನೀಡಿದೆ.

ಟಾಸ್  ಗೆದ್ದ ವಾರಿಯರ್ಸ್ ತಂಡವು ಇಂಡಿಯನ್ಸ್ ತಂಡವನ್ನು ಬ್ಯಾಟಿಂಗ್ ಗೆ ಆಹ್ವಾನಿಸಿತು.  ಮುಂಬೈ ಇಂಡಿಯನ್ಸ್ ಪರ ಹ್ಯಾವ್ಲೆ ಮ್ಯಾಥೀವ್ಸ್, ಯಸ್ತಿಕ ಭಾಟಿಯಾ ಇನ್ನಿಂಗ್ಸ್ ಆರಂಭಿಸಿದರು. ಯುಪಿ ಬೌಲರ್ ಗಳನ್ನು ದಂಡಿಸಿದ ಬ್ಯಾಟರ್ ಗಳು 50 ರನ್ ಗಳ ಜೊತೆಯಾಟ ಪ್ರದರ್ಶಿಸಿದರು.

22 ಎಸೆತ ಎದುರಿಸಿದ ಯಸ್ತಿಕ ಭಾಟಿಯಾ 3 ಬೌಂಡರಿ 1 ಸಿಕ್ಸರ್ ಸಹಿತ 26 ರನ್ ಗಳಿಸಿದ್ದಾಗ,  ಗ್ರೇಸ್ ಹರಿಸ್ ಅವರ ಎಸೆತದಲ್ಲಿ ಶಾರ್ಟ್ ಮಿಡ್ ವಿಕೆಟ್ ನಲ್ಲಿ ರಾಜೇಶ್ವರಿ  ಗಾಯಕ್ವಾಡ್ ಗೆ  ಕ್ಯಾಚಿತ್ತರು.  ಅವರ ಸ್ಥಾನಕ್ಕೆ ನಟ್ ಸ್ಕೀವೆರ್ ಬ್ರುಟ್ ಕ್ರೀಸ್ ಗೆ ಬಂದರು.

ಯುಪಿ ಬೌಲರ್ ಗಳನ್ನು ದಂಡಿಸುತ್ತಿದ್ದ ಹ್ಯಾವ್ಲೆ ಮ್ಯಾಥೀವ್ಸ್ ಅವರಿಗೆ ನಟ್ ಸ್ಕೀವರ್ ಬ್ರುಟ್ ಸಾಥ್ ನೀಡಿದರು.   47 ಎಸೆತ ಎದುರಿಸಿದ ಹ್ಯಾವ್ಲೆ ಮ್ಯಾಥೀವ್ಸ್ 9 ಬೌಂಡರಿ 1 ಸಿಕ್ಸರ್ ಸಹಿತ 55 ರನ್ ಕಲೆಹಾಕಿ, ಅರ್ಧ ಶತಕ ಪೂರೈಸಿ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿದರು.  ರಾಜೇಶ್ವರಿ  ಗಾಯಕ್ವಾಡ್ ಅವರ ಎಸೆತಕ್ಕೆ ಗ್ರೇಸ್ ಹರಿಸ್ ಅವರಿಗೆ ಕ್ಯಾಚಿತ್ತು ವಿಕೆಟ್ ಒಪ್ಪಿಸಿದರು