ಪುಣೆಯ ಭೋಸರಿ ಕ್ಷೇತ್ರದಲ್ಲಿ ಬಿಜೆಪಿ ಶಾಸಕ ಪ್ರಭು ಚವ್ಹಾಣ ಚುನಾವಣಾ ಪ್ರಚಾರ
Update: 2024-11-12 12:25 GMT
ಬೀದರ್ : ಮಾಜಿ ಸಚಿವರು ಔರಾದ(ಬಿ) ಶಾಸಕರಾದ ಪ್ರಭು ಚವ್ಹಾಣ ಅವರು ಮಂಗಳವಾರ ಪುಣೆಯ ಭೋಸರಿ ವಿಧಾನಸಭಾ ಕ್ಷೇತ್ರದ ಶಾಂತಿನಗರ, ಇಂದಿರಾನಗರ, ವಸಹತಿ ತಾಂಡಾ ಸೇರಿದಂತೆ ಹಲವು ಕಡೆಗಳಲ್ಲಿ ಮನೆ-ಮನೆಗೆ ತೆರಳಿ ಪಕ್ಷದ ಕರಪತ್ರಗಳನ್ನು ವಿತರಿಸಿ ಬಿಜೆಪಿ ಪಕ್ಷದ ಅಭ್ಯರ್ಥಿ ಮಹೇಶ ಲಾಂಡರವರ ಪರವಾಗಿ ಪ್ರಚಾರ ನಡೆಸಿದರು.
ಭೋಸರಿಯಲ್ಲಿ ಜರುಗಿದ ಬೀದರ್- ಕಲಬುರಗಿ ನಿವಾಸಿಗಳ ಸ್ನೇಹಮೇಳದಲ್ಲಿ ಮಾತನಾಡಿದ ಶಾಸಕರು, ಮಹಾರಾಷ್ಟ್ರದಲ್ಲಿ ಮಹಾಯುತಿ ಸರಕಾರ ಉತ್ತಮ ಆಡಳಿತ ನೀಡುತ್ತಿದೆ. ಮುಖ್ಯಮಂತ್ರಿ ಏಕನಾಥ ಶಿಂಧೆ, ಉಪ ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್, ಅಜಿತ್ ಪವಾರ್ ಅವರ ಮುಂದಾಳತ್ವದಲ್ಲಿ ಮಹಾರಾಷ್ಟ್ರ ಪ್ರಗತಿ ಪಥದಲ್ಲಿ ಮುನ್ನಡೆಯುತ್ತಿದೆ ಎಂದರು.
ಲಾಡ್ ಕಿ ಬೆಹೆನ್ ಯೋಜನೆ, ಪ್ರಧಾನಮಂತ್ರಿ ರೈತ ಸಮ್ಮಾನ್ ನಿಧಿ ಯೋಜನೆ, ರೈತರ ಸಾಲ ಮನ್ನಾ, ವಿದ್ಯಾಭ್ಯಾಸಕ್ಕೆ ಬಡ್ಡಿ ರಹಿತ ಸಾಲ, ರೈತರಿಗೆ ಉಚಿತ ವಿದ್ಯುತ್ ಸೌಲಭ್ಯದಂತಹ ಹಲವಾರು ಜನಪರ, ರೈತಪರ ಯೋಜನೆಗಳನ್ನು ಜಾರಿಗೆ ತರಲಾಗಿದೆ. ಈ ಸರಕಾರವನ್ನು ಮತ್ತೊಮ್ಮೆ ಅಧಿಕಾರಕ್ಕೆ ತರಬೇಕು ಎಂದು ಕೋರಿದರು.
ಈ ಸಂದರ್ಭದಲ್ಲಿ ಬಸವಕಲ್ಯಾಣ ಶಾಸಕರಾದ ಶರಣು ಸಲಗರ್, ಸಂತೋಷ ಲೋಂಡೆ, ಶಿವರಾಜ ಅಲ್ಮಾಜೆ, ಭರತ ಕದಮ್, ರಾಹುಲ್ ಪಾಟೀಲ್, ವಿಷ್ಣು ಮಾರುತಿ, ಅಮಿತ ರಾಠೋಡ, ಧನರಾಜ ರಾಠೋಡ, ಮಂಜು ಸ್ವಾಮಿ, ವೀರೇಂದ್ರ ರಾಜಾಪೂರೆ, ಸಚಿನ ರಾಠೋಡ, ಶಿವಕುಮಾರ ಝುಲ್ಫೆ ಮತ್ತಿತರರು ಉಪಸ್ಥಿತರಿದ್ದರು.