ಅಮೆರಿಕ ಸಂಸತ್‌ನಲ್ಲಿ ನಿರಂತರ 25 ಗಂಟೆ ನಿಂತುಕೊಂಡೇ ಭಾಷಣ ಮಾಡಿದ ಸಂಸದ; ಟ್ರಂಪ್ ವಿರುದ್ಧ ವಾಗ್ದಾಳಿ
Screengrab: X/Donald Trump
ನ್ಯೂಯಾರ್ಕ್: ಡೆಮಾಕ್ರಟಿಕ್ ಪಕ್ಷದ ಸಂಸದ ಕೋರಿ ಬುಕರ್ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ವಿರುದ್ಧ ಸೆನೆಟ್‌ನಲ್ಲಿ ಸತತ 25 ಗಂಟೆಗಳಿಗೂ ಹೆಚ್ಚು ಕಾಲ ಮಾತನಾಡುವ ಮೂಲಕ ಅಮೆರಿಕ ಸಂಸತ್ತಿನಲ್ಲಿ ಅತಿ ಉದ್ದದ ಭಾಷಣ ಮಾಡಿದ ದಾಖಲೆಯನ್ನು ಸೃಷ್ಟಿಸಿದ್ದಾರೆ. ಬುಕರ್ ಸೋಮವಾರ ಸಂಜೆ ತಮ್ಮ ಭಾಷಣವನ್ನು ಪ್ರಾರಂಭಿಸಿ, ಮಂಗಳವಾರ ಸಂಜೆ ಮುಗಿಸಿದರು.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ವಿರುದ್ಧ ಸೆನೆಟ್‌ನಲ್ಲಿ ಡೆಮಾಕ್ರಟಿಕ್ ಪಕ್ಷದ ಸಂಸದ ಕೋರಿ ಬುಕರ್ ಸತತ 25 ಗಂಟೆಗಳಿಗೂ ಹೆಚ್ಚು ಕಾಲ ಮಾತನಾಡುವ ಮೂಲಕ ಐತಿಹಾಸಿಕ ದಾಖಲೆ ಮಾಡಿದ್ದಾರೆ.
55 ವರ್ಷದ ಕೋರಿ ಬುಕರ್ ಸೋಮವಾರ ಸಂಜೆ ಪ್ರಾರಂಭಿಸಿದ ತಮ್ಮ ಮ್ಯಾರಥಾನ್ ಭಾಷಣವನ್ನು ಮಂಗಳವಾರ ರಾತ್ರಿ ಮುಗಿಸಿದರು.
ಈ ನಡುವೆ ಅವರು ಒಂದೇ ಒಂದು ವಿರಾಮ ತೆಗೆದುಕೊಂಡಿಲ್ಲ, ಕೂತಿಲ್ಲ, ಶೌಚಾಲಯಕ್ಕೂ ಹೋಗಿಲ್ಲ, ಏನನ್ನೂ ತಿಂದಿಲ್ಲ, ಕನಿಷ್ಠ ನೀರನ್ನೂ ಕುಡಿದಿಲ್ಲ.
ಮಾತನಾಡಲು ಪ್ರಾರಂಭಿಸಿದ 25 ಗಂಟೆ 5 ನಿಮಿಷಗಳ ನಂತರ ಟ್ರಂಪ್ ಆಡಳಿತವನ್ನು ಖಂಡಿಸಿ ತಮ್ಮ ಭಾಷಣವನ್ನು ಬುಕರ್ ಮುಕ್ತಾಯಗೊಳಿಸಿದರು. ತಮ್ಮ ಭಾಷಣದ ಕೊನೆಯಲ್ಲಿ ಅವರು ಅಮೆರಿಕನ್ ನಾಗರಿಕ ಹಕ್ಕುಗಳ ಐಕಾನ್ ಜಾನ್ ಲೂಯಿಸ್ ಅವರನ್ನು ನೆನಪಿಸಿಕೊಂಡರು.
ಇಷ್ಟು ದೀರ್ಘ ಭಾಷಣದುದ್ದಕ್ಕೂ ಅವರು ನಿಂತೇ ಇದ್ದರು ಎಂಬುದು ವಿಶೇಷ. ವಿರಾಮವಿಲ್ಲದೆ ನಿಂತುಕೊಂಡೇ ಕೋರಿ ಬುಕರ್ ಭಾಷಣ ಮಾಡಿದರು. ಟ್ರಂಪ್ ಅವರ ನೀತಿಗಳನ್ನು ವಿರೋಧಿಸಲು ಅವರು ಸೆನೆಟ್‌ನ ನಿಯಮವನ್ನು ಬಳಸಿಕೊಂಡರು. ಇದು ಸೆನೆಟರ್‌ಗಳಿಗೆ ಸಮಯ ಮಿತಿಯಿಲ್ಲದೆ ಮಾತನಾಡಲು ಅವಕಾಶ ನೀಡುತ್ತದೆ. ಭಾಷಣಕ್ಕೆ ನಿಂತ ಸೆನೆಟರ್ ಭಾಷಣ ನಿಲ್ಲಿಸದೆ, ಕೂತುಕೊಳ್ಳದೆ ಎಷ್ಟು ಹೊತ್ತು ಬೇಕಾದರೂ ಮಾತಾಡಬಹುದು.
ಟ್ರಂಪ್ ಅವರ ನೀತಿಗಳನ್ನು ವಿರೋಧಿಸುವ ತಮ್ಮ ಈ ಭಾಷಣದ ಉದ್ದಕ್ಕೂ ಅವರು ಸಹಿಷ್ಣುತೆ ಪ್ರದರ್ಶಿಸಿದರು.
ಈ ದೀರ್ಘ ಭಾಷಣದೊಂದಿಗೆ ಅವರು 67 ವರ್ಷಗಳ ಹಿಂದಿನ ಸ್ಟ್ರೋಮ್ ಥರ್ಮಂಡ್ ಅವರ ಭಾಷಣದ ದಾಖಲೆ ಮುರಿದಿದ್ದಾರೆ.
1957 ರಲ್ಲಿ ಬಲಪಂಥೀಯ ರಿಪಬ್ಲಿಕನ್ ಸ್ಟ್ರೋಮ್ ಥರ್ಮಂಡ್ ನಾಗರಿಕ ಹಕ್ಕುಗಳ ಕಾಯ್ದೆಯನ್ನು ವಿರೋಧಿಸಿ 24 ಗಂಟೆ 18 ನಿಮಿಷಗಳ ಕಾಲ ಮಾತನಾಡಿದ್ದರು ಎಂದು ಸೆನೆಟ್ ದಾಖಲೆಗಳು ಹೇಳುತ್ತವೆ.
ಕೋರಿ ಬುಕರ್ ಯಾರು?
ಕೋರಿ ಬುಕರ್ ನ್ಯೂಜೆರ್ಸಿಯ ಡೆಮೋಕ್ರಾಟ್ ಸಂಸದರಾಗಿದ್ದಾರೆ. ಅವರ ವೆಬ್‌ಸೈಟ್ ಪ್ರಕಾರ, ಕೋರಿ ಉತ್ತರ ನ್ಯೂಜೆರ್ಸಿಯಲ್ಲಿ ಬೆಳೆದರು. ಸ್ಟ್ಯಾನ್‌ಫೋರ್ಡ್ ವಿಶ್ವವಿದ್ಯಾಲಯದಿಂದ ಪದವಿ ಮತ್ತು ಸ್ನಾತಕೋತ್ತರ ಪದವಿ ಪಡೆದ ಅವರಿಗೆ ರೋಡ್ಸ್ ಸ್ಕಾಲರ್ಶಿಪ್ ಸಿಕ್ಕಿತ್ತು.
ಆಕ್ಸ್‌ಫರ್ಡ್ ವಿಶ್ವವಿದ್ಯಾಲಯದಲ್ಲಿ ಮತ್ತು ನಂತರ ಯೇಲ್ ಲಾ ಸ್ಕೂಲ್ ನಲ್ಲಿ ಅಧ್ಯಯನ ಮಾಡಿದ್ದಾರೆ. ಅಲ್ಲಿ ಅವರು 1997 ರಲ್ಲಿ ಪದವಿ ಪಡೆದರು.
2006 ರಿಂದ 2013 ರವರೆಗೆ ಅವರು ನೇವಾರ್ಕ್ ಮೇಯರ್ ಆಗಿ ಸೇವೆ ಸಲ್ಲಿಸಿದ್ದಾರೆ. ಅಕ್ಟೋಬರ್ 2013 ರಲ್ಲಿ ಯುಎಸ್ ಸೆನೆಟ್‌ನಲ್ಲಿ ನ್ಯೂಜೆರ್ಸಿಯನ್ನು ಪ್ರತಿನಿಧಿಸಲು ವಿಶೇಷ ಚುನಾವಣೆಯಲ್ಲಿ ಗೆದ್ದರು. ನವೆಂಬರ್ 2014 ರಲ್ಲಿ ಅವರು ಪೂರ್ಣ ಆರು ವರ್ಷಗಳ ಅವಧಿಗೆ ಮರು ಆಯ್ಕೆಯಾದರು.
ಕೋರಿ ಬುಕರ್ ತಮ್ಮ ಸುದೀರ್ಘ ಸೆನೆಟ್ ಹೇಳಿದ್ದೇನು?
ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ರಾಷ್ಟ್ರದ ಪ್ರಜಾಪ್ರಭುತ್ವ ಸಂಸ್ಥೆಗಳಿಗೆ ಅಪಾಯಕಾರಿಯಾಗುತ್ತಿದ್ದಾರೆ ಎಂದು ಕೋರಿ ಬುಕರ್ ಆರೋಪಿಸಿದರು. ಪ್ರಜಾಸತ್ತಾತ್ಮಕ ಸಂಸ್ಥೆಗಳ ಮೇಲೆ ಸಂವಿಧಾನಬಾಹಿರವಾಗಿ ದಾಳಿ ಮಾಡಲಾಗುತ್ತಿದೆ ಮತ್ತು ಛಿದ್ರಗೊಳಿಸಲಾಗುತ್ತಿದೆ ಎಂದ ಅವರು ಟ್ರಂಪ್ ಸರ್ಕಾರದಲ್ಲಿ ಅಮೆರಿಕದ ಮೂಲಭೂತ ತತ್ವಗಳು ಅಪಾಯದಲ್ಲಿವೆ ಮತ್ತು ರಾಷ್ಟ್ರ ಬಿಕ್ಕಟ್ಟನ್ನು ಎದುರಿಸುತ್ತಿದೆ ಎಂದು ಬುಕರ್ ಹೇಳಿದರು.
ಟ್ರಂಪ್ ಆಡಳಿತದ ಪ್ರಮುಖ ಅಂಶಗಳಾದ ಆರೋಗ್ಯ ರಕ್ಷಣೆ, ಶಿಕ್ಷಣ, ವಲಸೆ ಮತ್ತು ರಾಷ್ಟ್ರೀಯ ಭದ್ರತೆಯ ವಿಚಾರಕ್ಕೆ ಸಂಬಂಧಿಸಿ ಬುಕರ್ ತಮ್ಮ ಭಾಷಣವನ್ನು ಬೇರೆ ಬೇರೆ ಭಾಗಗಳಾಗಿ ವಿಂಗಡಿಸಿದರು.
ಟ್ರಂಪ್ ಆಡಳಿತದ ವಿರುದ್ಧದ ಹೋರಾಟವನ್ನು ಬುಕರ್ ಐತಿಹಾಸಿಕ ನಾಗರಿಕ ಹಕ್ಕುಗಳ ಚಳವಳಿ ಮತ್ತು ಮಹಿಳಾ ಮತದಾನದ ಹಕ್ಕಿನ ಹೋರಾಟಕ್ಕೆ ಹೋಲಿಸಿದ್ದಾರೆ.
ವಲಸಿಗರ ಮೇಲೆ ಟ್ರಂಪ್ ಆಡಳಿತದ ದಮನ ನೀತಿ ಮತ್ತು ಜೀವಗಳನ್ನು ಉಳಿಸುವ ನೆರವು ನೀಡುವುದರಲ್ಲಿ ತೊಡಗಿದ್ದ ಯುಎಸ್ ಏಜೆನ್ಸಿ ಫಾರ್ ಇಂಟರ್ನ್ಯಾಷನಲ್ ಡೆವಲಪ್ಮೆಂಟ್ (ಯುಎಸ್ ಏಡ್ ) ಅನ್ನು ಕಿತ್ತುಹಾಕುವುದನ್ನು ಅವರು ಟೀಕಿಸಿದರು.
ಥರ್ಮಂಡ್ ಭಾಷಣದ ಹೊರತಾಗಿಯೂ ನಾನು ಇಲ್ಲಿದ್ದೇನೆ. ಅವರು ಎಷ್ಟೇ ಶಕ್ತಿಶಾಲಿಯಾಗಿದ್ದರೂ, ಜನರು ಹೆಚ್ಚು ಶಕ್ತಿಶಾಲಿಯಾಗಿರುವುದರಿಂದ ನಾನು ಇಲ್ಲಿದ್ದೇನೆ ಎಂದು ಆಫ್ರಿಕನ್ ಅಮೆರಿಕನ್ ಆಗಿರುವ ಬುಕರ್ ಹೇಳಿದರು.
1957 ರ ನಾಗರಿಕ ಹಕ್ಕುಗಳ ಕಾಯ್ದೆಯನ್ನು ವಿರೋಧಿಸಿ ರಿಪಬ್ಲಿಕನ್ ಸ್ಟ್ರೋಮ್ ಥರ್ಮಂಡ್ ಅವರ ಅತ್ಯಂತ ಸುದೀರ್ಘ ಭಾಷಣ ನನ್ನಂತಹ ಹಿನ್ನೆಲೆಯವರು ಸೆನೆಟ್ ನಲ್ಲಿ ಇರದಂತೆ ವಿರೋಧಿಸಲು ಮಾಡಲಾಗಿತ್ತು, ಆದರೆ ಅದರ ಹೊರತಾಗಿಯೂ ನಾನು ಸೆನೆಟ್ ಗೆ ತಲುಪಿದ್ದೇನೆ , ಅವರ ಭಾಷಣದ ದಾಖಲೆ ಮುರಿಯಬೇಕು ಎಂದು ನಾನು ನಿರ್ಧರಿಸಿದ್ದೆ ಎಂದು ತಮ್ಮ ಭಾಷಣದ ಬಳಿಕ ಬುಕರ್ ಹೇಳಿದ್ದಾರೆ.
25 ಗಂಟೆಗಳ ಭಾಷಣದ ನಂತರ ಎಕ್ಸ್ ನಲ್ಲಿ ಬರೆದುಕೊಂಡಿರುವ ಕೋರಿ ಬುಕರ್, ನಾನು ದಣಿದಿರಬಹುದು. ಆದರೆ ನಾನು ಸೆನೆಟ್ ಭಾಷಣದಲ್ಲಿ ಪದೇ ಪದೇ ಹೇಳಿದಂತೆ, ನಾವು ಮಾತನಾಡಬೇಕಾದಾಗ ಮೌನವಾಗಿರಲು ಸಾಧ್ಯವಿಲ್ಲದ ಕ್ಷಣ ಅದು ಎಂದಿದ್ದಾರೆ.
ಅವ್ಯವಸ್ಥೆ ಮತ್ತು ವಿಭಜನೆಗೆ ನಾವು ಉತ್ತರಿಸದೆ ಬಿಡುವುದಿಲ್ಲ. ಅಧ್ಯಕ್ಷರು ಸುಳ್ಳುಗಳನ್ನು ಹರಡಲು ಮತ್ತು ಭಯವನ್ನು ಬಿತ್ತಲು ಹೊರಟಿರುವಾಗ ನಾವು ಒಟ್ಟಿಗೆ ಕೆಲಸ ಮಾಡಲು ತಯಾರಾಗಿದ್ದೇವೆ ಎಂದು ಅವರು ಬರೆದಿದ್ದಾರೆ.
ಸೆನೆಟರ್ ಕಚೇರಿಯ ಪತ್ರಿಕಾ ಪ್ರಕಟಣೆ ಬುಕರ್ ಭಾಷಣದ ಟಿಕ್‌ಟಾಕ್ ನೇರಪ್ರಸಾರ 350 ಮಿಲಿಯನ್‌ಗಿಂತಲೂ ಹೆಚ್ಚು ಲೈಕ್‌ಗಳನ್ನು ಗಳಿಸಿದೆ ಮತ್ತು ಅದನ್ನು ಬೆಂಬಲಿಸಿ 28,000 ಕ್ಕೂ ಹೆಚ್ಚು ಧ್ವನಿಮೇಲ್‌ಗಳು ಬಂದಿವೆ ಎಂದು ಹೇಳಿಕೊಂಡಿರುವುದು ವರದಿಯಾಗಿದೆ.
25 ಗಂಟೆಗಳಿಗೂ ಕಾಲ ಹೇಗೆ ಬುಕರ್ ಒಂದು ನಿಮಿಷವೂ ಬ್ರೇಕ್ ತೆಗೆದುಕೊಳ್ಳದೆ, ಶೌಚಾಲಯಕ್ಕೂ ಹೋಗದೆ, ನೀರನ್ನೂ ಕುಡಿಯದೆ ಭಾಷಣ ಮಾಡಿದರು ಎಂಬುದು ಇನ್ನೊಂದು ಚರ್ಚೆಗೆ ಕಾರಣವಾಗಿದೆ.
ಇದಕ್ಕಾಗಿ ತಾನು ಸಾಕಷ್ಟು ತಯಾರಿ ಮಾಡಿದ್ದೆ, ಉಪವಾಸ ಆಚರಿಸುವುದು, ನೀರು ಕಡಿಮೆ ಕುಡಿಯುವುದು ಇತ್ಯಾದಿಗಳ ಮೂಲಕ ಸಿದ್ಧತೆ ನಡೆಸಿದ್ದೆ ಎಂದು ಬುಕರ್ ಹೇಳಿದ್ದಾರೆ.