ರಣಜಿ ಟ್ರೋಫಿ | ಮುಂಬೈ ಪರ ಶ್ರೇಯಸ್ ಅಯ್ಯರ್ ಸತತ 2ನೇ ಶತಕ

ಹೊಸದಿಲ್ಲಿ : ಜನವರಿಯಲ್ಲಿ ಭಾರತ ಕ್ರಿಕೆಟ್ ತಂಡವು ಇಂಗ್ಲೆಂಡ್‌ ಗೆ ಪ್ರವಾಸ ಕೈಗೊಂಡ ನಂತರ ಟೆಸ್ಟ್ ತಂಡದಿಂದ ಹೊರಗುಳಿದಿರುವ ಮಧ್ಯಮ ಸರದಿಯ ಬ್ಯಾಟರ್ ಶ್ರೇಯಸ್ ಅಯ್ಯರ್ ಸದ್ಯ ದೇಶಿಯ ರಣಜಿ ಟ್ರೋಫಿಯಲ್ಲಿ ಮಿಂಚುತ್ತಿದ್ದು, ತನ್ನ ಮುಂಬೈ ತಂಡದ ಪರ ಸತತ ಶತಕಗಳನ್ನು ಸಿಡಿಸಿ ಗಮನ ಸೆಳೆದಿದ್ದಾರೆ.

ಮುಂಬೈ ತಂಡವು ನಾಕೌಟ್ ಹಂತಕ್ಕೇರುವುದು ಈ ಪಂದ್ಯದಲ್ಲಿನ ಗೆಲುವನ್ನು ಅವಲಂಬಿಸಿದೆ. ತ್ರಿಪುರಾ ವಿರುದ್ಧ ಪಂದ್ಯದಿಂದ ಹೊರಗುಳಿದಿದ್ದ ಶ್ರೇಯಸ್ ಅಯ್ಯರ್ ಒಡಿಶಾ ವಿರುದ್ಧ ಬುಧವಾರ ಆರಂಭವಾದ ರಣಜಿ ಪಂದ್ಯದಲ್ಲಿ 101 ಎಸೆತಗಳಲ್ಲಿ ತನ್ನ 15ನೇ ಪ್ರಥಮ ದರ್ಜೆ ಶತಕ ದಾಖಲಿಸಿದರು. 14 ಬೌಂಡರಿ ಹಾಗೂ 2 ಸಿಕ್ಸರ್‌ಗಳ ಸಹಾಯದಿಂದ ತನ್ನದೇ ಶೈಲಿಯಲ್ಲಿ ಶತಕ ತಲುಪಿದರು. ಪ್ರಸಕ್ತ ರಣಜಿಯಲ್ಲಿ ಶ್ರೇಯಸ್ ಅಯ್ಯರ್ ಗಳಿಸಿರುವ ಎರಡನೇ ಶತಕ ಇದಾಗಿದೆ.

ಕಳೆದ ತಿಂಗಳು ಮುಂಬೈನ ಬಿಕೆಸಿಯಲ್ಲಿ ನಡೆದಿದ್ದ ಪಂದ್ಯದಲ್ಲಿ ಮಹಾರಾಷ್ಟ್ರ ತಂಡದ ವಿರುದ್ಧ ಅಯ್ಯರ್ ಶತಕ ಸಿಡಿಸಿದ್ದರು.

ಮುಂಬೈ ಉತ್ತಮ ಆರಂಭ ಪಡೆದಿದ್ದು, ಅಂಕ್ರಿಶ್ ರಘುವಂಶಿ ಕೇವಲ 8 ರನ್‌ನಿಂದ ಶತಕ ವಂಚಿತರಾದರು. ಫಿಟ್ನೆಸ್ ಸಮಸ್ಯೆಯಿಂದಾಗಿ ತಂಡದಿಂದ ಹೊರಗುಳಿದಿದ್ದ ಪೃಥ್ವಿ ಶಾ ಬದಲಿಗೆ ರಘುವಂಶಿಗೆ ಅವಕಾಶ ನೀಡಲಾಗಿತ್ತು. ರಘುವಂಶಿ ಹಾಗೂ ನಾಯಕ ಅಜಿಂಕ್ಯ ರಹಾನೆ(0)ಅವರ ವಿಕೆಟ್‌ ಗಳನ್ನು ಉರುಳಿಸಿದ ಒಡಿಶಾ ತಂಡ ಮರು ಹೋರಾಟ ನೀಡಿತು.