ಉತ್ತರ ಪ್ರದೇಶ: 8 ರೈಲು ನಿಲ್ದಾಣಗಳಿಗೆ ದೇವಾಲಯ, ಆಶ್ರಮಗಳ ಹೆಸರುಗಳ ಮರುನಾಮಕರಣ

ಲಕ್ನೋ: ಅಮೇಥಿ ಜಿಲ್ಲೆಯ ಎಂಟು ರೈಲು ನಿಲ್ದಾಣಗಳಿಗೆ ಸ್ಥಳೀಯ ದೇವಾಲಯಗಳು, ಸಂತರು, ವಿಗ್ರಹ ಮತ್ತು ಸ್ವಾತಂತ್ರ್ಯ ಹೋರಾಟಗಾರರ ಹೆಸರನ್ನು ಮರುನಾಮಕರಣ ಮಾಡುವ ಯುಪಿ ಸರ್ಕಾರದ ಪ್ರಸ್ತಾವನೆಗೆ ಕೇಂದ್ರ ಗೃಹ ಸಚಿವಾಲಯವು ಮಂಗಳವಾರ ನಿರಾಕ್ಷೇಪಣಾ ಪ್ರಮಾಣಪತ್ರವನ್ನು (ಎನ್‌ಒಸಿ) ನೀಡಿದೆ.

ಈ ಕ್ರಮವನ್ನು ಬಿಜೆಪಿ ಅಮೇಥಿ ಸಂಸದೆ ಸ್ಮೃತಿ ಇರಾನಿ ಅವರು ಪ್ರಾರಂಭಿಸಿದ್ದು, ಪ್ರಾದೇಶಿಕ ಸಾಂಸ್ಕೃತಿಕ ಗುರುತು ಮತ್ತು ಪರಂಪರೆಯನ್ನು ಕಾಪಾಡುವ ದೃಷ್ಟಿಯಿಂದ ತಮ್ಮ ಕ್ಷೇತ್ರದ ಎಂಟು ರೈಲು ನಿಲ್ದಾಣಗಳ ಹೆಸರನ್ನು ಬದಲಾಯಿಸಲಾಗಿದೆ ಎಂದು ಅವರು ಬುಧವಾರ ಹೇಳಿದ್ದಾರೆ.

"ವಿರಾಸತ್ ಭೀ, ವಿಕಾಸ್ ಭಿ... ಅಮೇಥಿ ಲೋಕಸಭಾ ಕ್ಷೇತ್ರದ ಎಂಟು ರೈಲು ನಿಲ್ದಾಣಗಳ ಹೆಸರನ್ನು ಬದಲಾಯಿಸಲು ನಿರ್ಧರಿಸಲಾಗಿದೆ ಎಂದು ತಿಳಿಸಲು ನನಗೆ ಸಂತೋಷವಾಗಿದೆ. ಈ ನಿರ್ಧಾರವು ಅಮೇಥಿಯ ಸಾಂಸ್ಕೃತಿಕ ಅಸ್ಮಿತೆ ಮತ್ತು ಪರಂಪರೆಯನ್ನು ಉಳಿಸುವಲ್ಲಿ ಉಪಯುಕ್ತವಾಗಿದೆ" ಎಂದು ಎಕ್ಸ್‌ನಲ್ಲಿ ಸ್ಮೃತಿ ಇರಾನಿ ಬರೆದಿದ್ದಾರೆ.

ಕಾಸಿಂಪುರ ರೈಲ್ವೇ ಸ್ಟೇಷನ್‌ ಅನ್ನು ಜೈಸ್ ಸಿಟಿ ಎಂದು ಮರುನಾಮಕರಣ ಮಾಡಲು ಮತ್ತು ಜೈಸ್‌ನಂತಹ ಮಧ್ಯಂತರ ನಿಲ್ದಾಣಗಳನ್ನು ಗುರು ಗೋರಖ್‌ನಾಥ್ ಧಾಮ್ ಎಂದು, ಬನಿ ನಿಲ್ದಾಣವನ್ನು ಸ್ವಾಮಿ ಪರಮಹಂಸ್ ಎಂದು, ಮಿಸ್ರೌಲಿಯನ್ನು ಮಾ ಕಾಲಿಕನ್ ಧಾಮ್ ಎಂದು, ನಿಹಾಲ್‌ಗಢವನ್ನು ಮಹಾರಾಜ ಬಿಜ್ಲಿ ಪಾಸಿ ಎಂದು, ಅಕ್ಬರ್ಗಂಜ್ ಅನ್ನು ಮಾ ಅಹೋರ್ವಾ ಭವಾನಿ ಧಾಮ್ ಎಂದು, ವಾರಿಸ್ಗಂಜ್ ಅನ್ನು ಅಮರ್ ಶಾಹಿದ್ ಭಲೇ ಸುಲ್ತಾನ್ ಎಂದು ಮತ್ತು ಫರ್ಸತ್ಗಂಜ್ ತಪೇಶ್ವರನಾಥ್ ಧಾಮ್ ಆಗಿ ಮರುನಾಮಕರಣ ಮಾಡಲು ಫೆಬ್ರವರಿ 12 ರಂದು ಸರ್ಕಾರವು MHA ಗೆ ಪ್ರಸ್ತಾವನೆಯನ್ನು ರವಾನಿಸಿತ್ತು.

“ಸ್ಥಳೀಯ ದೇವಾಲಯಗಳು, ಸಂತರು, ವಿಗ್ರಹಗಳು ಮತ್ತು ಸ್ವಾತಂತ್ರ್ಯ ಹೋರಾಟಗಾರರ ಹೆಸರನ್ನು ಅಮೇಥಿಯಲ್ಲಿ ರೈಲು ನಿಲ್ದಾಣಗಳಿಗೆ ಮರುನಾಮಕರಣ ಮಾಡಬೇಕೆಂಬ ಬಹುಕಾಲದ ಬೇಡಿಕೆಯಿದೆ" ಎಂದು ಬಿಜೆಪಿಯ ಅಮೇಥಿ ಘಟಕದ ಜಿಲ್ಲಾಧ್ಯಕ್ಷ ರಾಮ್ ಪ್ರಸಾದ್ ಮಿಶ್ರಾ ಟೈಮ್ಸ್‌ ಆಫ್‌ ಇಂಡಿಯಾಗೆ ಹೇಳಿದರು.

"ನಿಲ್ದಾಣದಿಂದ ದೂರದಲ್ಲಿರುವ ಮುಸ್ಲಿಂ ಬಾಹುಳ್ಯ ಇರುವ ಕಾಸಿಂಪುರ ಗ್ರಾಮದ ಹೆಸರನ್ನು ಕಾಸಿಂಪುರ ಹಾಲ್ಟ್ ರೈಲ್ವೆ ನಿಲ್ದಾಣಕ್ಕೆ ಹೆಸರಿಸಲಾಗಿತ್ತು‌. ಇದನ್ನು ಜೈಸ್ ಸಿಟಿ ಎಂದು ಮರುನಾಮಕರಣ ಮಾಡಬೇಕೆಂದು ಸಲಹೆ ನೀಡಲಾಯಿತು. ಪ್ರಸ್ತುತ ಜೈಸ್ ರೈಲು ನಿಲ್ದಾಣವು ಅದರ ಸಮೀಪದಲ್ಲಿ ಅನೇಕ ಆಶ್ರಮಗಳನ್ನು ಹೊಂದಿದೆ. ಪ್ರಮುಖವಾದದ್ದು ಗುರು ಗೋರಖನಾಥ ಧಾಮ್ ಆಶ್ರಮ. ನಿಲ್ದಾಣಕ್ಕೆ ಆಶ್ರಮದ ಹೆಸರನ್ನು ಮರುನಾಮಕರಣ ಮಾಡಲು ಪ್ರಸ್ತಾಪಿಸಲಾಗಿದೆ" ಅವರು ಹೇಳಿದರು.

"ಬಾನಿ, ಮಿಸ್ರೌಲಿ, ಅಕ್ಬರ್‌ಗಂಜ್ ಮತ್ತು ಫುರ್ಸತ್‌ಗಂಜ್ ರೈಲ್ವೆ ನಿಲ್ದಾಣಗಳ ಬಳಿ ಭಗವಾನ್ ಶಿವ ಮತ್ತು ಕಾಳಿ ದೇವಿಯ ಅನೇಕ ದೇವಾಲಯಗಳಿವೆ, ಆದ್ದರಿಂದ ಅವುಗಳನ್ನು ಕ್ರಮವಾಗಿ ಸ್ವಾಮಿ ಪರಮಹಾನ್ಸ್, ಮಾ ಕಾಲಿಕನ್ ಧಾಮ್, ಮಾ ಅಹೋರ್ವಾ ಭವಾನಿ ಧಾಮ್ ಮತ್ತು ತಾಪೇಶ್ವರನಾಥ ಧಾಮ್ ರೈಲು ನಿಲ್ದಾಣಗಳು ಎಂದು ಮರುನಾಮಕರಣ ಮಾಡುವ ಪ್ರಸ್ತಾಪವನ್ನು ಮಾಡಲಾಯಿತು ಎಂದು ಅವರು ಹೇಳಿದರು.

"ಸರ್ಕಾರವು ಅಮೇಥಿಯಲ್ಲಿ ಧಾರ್ಮಿಕ ಪ್ರವಾಸೋದ್ಯಮವನ್ನು ಉತ್ತೇಜಿಸಲು ಯೋಜಿಸುತ್ತಿದ್ದು, ಶೀಘ್ರದಲ್ಲೇ ಬಜೆಟ್ ಅನ್ನು ನಿಗದಿಪಡಿಸಲಾಗುವುದು. ಹೆಸರು ಬದಲಾವಣೆ ಕೇವಲ ಮೊದಲ ಹೆಜ್ಜೆಯಾಗಿದೆ" ಎಂದು ಅವರು ಹೇಳಿದರು.

"ನಿಹಾಲ್‌ಗಢ್ ರೈಲ್ವೇ ನಿಲ್ದಾಣದ ಸಂದರ್ಭದಲ್ಲಿ, ಹಲಸು ಕೃಷಿಯಲ್ಲಿ ತೊಡಗಿರುವ ಬಹುತೇಕ ರೈತರು ಪಾಸಿ ಸಮುದಾಯದ ಪ್ರಾಬಲ್ಯವನ್ನು ಹೊಂದಿದ್ದಾರೆ. ಆದ್ದರಿಂದ, ನಿಲ್ದಾಣವನ್ನು ಮಹಾರಾಜ ಬಿಜ್ಲಿ ಪಾಸಿ ಎಂದು ಮರುನಾಮಕರಣ ಮಾಡಲು ನಿರ್ಧರಿಸಲಾಯಿತು. ವಾರಿಸ್‌ಗಂಜ್ ರೈಲು ನಿಲ್ದಾಣದ ಸಂದರ್ಭದಲ್ಲಿ, ಪ್ರದೇಶವು 1857 ರಲ್ಲಿ ಬ್ರಿಟಿಷ್ ರಾಜ್ ವಿರುದ್ಧ ಹೋರಾಡಿದ ಠಾಕೂರ್ ವ್ಯಕ್ತಿ ಭಲೇ ಸುಲ್ತಾನನ ಶೌರ್ಯಕ್ಕೆ ಹೆಸರುವಾಸಿಯಾಗಿದೆ. ಆದ್ದರಿಂದ ನಿಲ್ದಾಣವನ್ನು ಅಮರ್ ಶಾಹಿದ್ ಭಲೇ ಸುಲ್ತಾನ್ ರೈಲು ನಿಲ್ದಾಣ ಎಂದು ಮರುನಾಮಕರಣ ಮಾಡಲು ನಿರ್ಧರಿಸಲಾಯಿತು" ಎಂದು ಮಿಶ್ರಾ ಹೇಳಿದರು.