ವಿಶ್ವದ ಅತ್ಯಂತ ಮಾಲಿನ್ಯ ನಗರಗಳ ಪಟ್ಟಿಯಲ್ಲಿ ಮೋದಿ ಕ್ಷೇತ್ರ ವಾರಣಾಸಿಗೆ 3ನೆ ಸ್ಥಾನ: ವರದಿ

ಹೊಸದಿಲ್ಲಿ,ಎ.10: ಪ್ರಧಾನಿ ನರೇಂದ್ರ ಮೋದಿಯವರ ಲೋಕಸಭಾ ಕ್ಷೇತ್ರವಾಗಿರುವ ವಾರಣಾಸಿಯು ವಿಶ್ವ ಆರೋಗ್ಯ ಸಂಸ್ಥೆ(ಡಬ್ಲುಎಚ್‌ಒ)ಯ ವಿಶ್ವದ ಅತ್ಯಂತ ಪರಿಸರ ಮಾಲಿನ್ಯನಗರಗಳ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದೆ ಮತ್ತು ಅಲ್ಲಿಯ ಸಂಸದರು(ಮೋದಿ) ಸುಂದರೀಕರಣ ಮತ್ತು ಮೂಲಸೌಕರ್ಯಗಳ ಮೇಲೆ ಹೆಚ್ಚಿನ ಗಮನವನ್ನು ಹರಿಸಿರುವುದರಿಂದಅಲ್ಲಿ ವಾಯು ಗುಣಮಟ್ಟವು ತೀವ್ರವಾಗಿ ಹದಗೆಡುತ್ತಿದೆ ಎಂದು ದಿಲ್ಲಿಯ ಪರಿಸರ ಸಂಸ್ಥೆ ಕೈಮೆಟ್ ಟ್ರೆಂಡ್ಸ್ ಹೇಳಿದೆ.

ದಿಲ್ಲಿಯು ಪಟ್ಟಿಯಲ್ಲಿ ಆರನೇ ಸ್ಥಾನದಲ್ಲಿದೆ ಮತ್ತು ನಗರದಲ್ಲಿಯ ವಾಯುಮಾಲಿನ್ಯವನ್ನು ತಡೆಯುವಲ್ಲಿ ಚುನಾಯಿತ ಜನಪ್ರತಿನಿಧಿಗಳು ಅಸಡ್ಡೆ ತೋರುತ್ತಿದ್ದಾರೆ ಎಂದು ಅದು ತನ್ನವರದಿಯಲ್ಲಿ ತಿಳಿಸಿದೆ.

ಡಬ್ಲ್ಯುಎಚ್‌ಒದ ವಿಶ್ವದ ಅತ್ಯಂತ ಹೆಚ್ಚಿನ ವಾಯುಮಾಲಿನ್ಯಗೊಂಡ 15 ನಗರಗಳ ಪಟ್ಟಿಯಲ್ಲಿನ 14 ನಗರಗಳು ಭಾರತದಲ್ಲಿವೆ ಮತ್ತು ಈ ಪೈಕಿ ನಾಲ್ಕು ನಗರಗಳು ಉತ್ತರಪ್ರದೇಶದಲ್ಲಿವೆ ಎಂದು ತಿಳಿಸಿರುವ ವರದಿಯು,ಈ ನಗರಗಳಲ್ಲಿಯ ಆಯಾ ಸಂಬಂಧಿತ ಪ್ರಾಧಿಕಾರಗಳ ಉದ್ದೇಶಿತ ಕ್ರಮಗಳು ಮತ್ತು ಕಾರ್ಯಗಳನ್ನೂ ಪಟ್ಟಿ ಮಾಡಿದೆ.

ಉತ್ತರ ಪ್ರದೇಶದ ವಾರಣಾಸಿಯಲ್ಲಿ ಬಹಳಷ್ಟು ನಿರ್ಮಾಣ ಕಾಮಗಾರಿಗಳು ನಡೆಯುತ್ತಿರುವುದರಂದ ಅಲರ್ಜಿಗಳು ಮತ್ತು ಉಸಿರಾಟದ ಸಮಸ್ಯೆಗಳಿಂದ ನರಳುತ್ತಿರುವ ಜನರಸಂಖ್ಯೆ ಹೆಚ್ಚುತ್ತಿದೆ ಎಂದು ಅದು ಹೇಳಿದೆ. ಮೋದಿ 2014ರ ಲೋಕಸಭಾ ಚುನಾವಣೆಯಲ್ಲಿ ವಾರಣಾಸಿಯಿಂದ ಗೆದ್ದಿದ್ದರು.
ನಗರದಲ್ಲಿಯ ನಿರ್ಮಾಣ ಕಾಮಗಾರಿಗಳ ಭರಾಟೆಯಿಂದಾಗಿ ಉತ್ತರ ಪ್ರದೇಶದ ಇತರ ನಗರಗಳಿಗಂತ ವಾರಣಾಸಿಯಲ್ಲಿ ವಾಯು ಗುಣಮಟ್ಟವು ತೀವ್ರವಾಗಿ ಹದಗೆಡುತ್ತಿದೆ. ಕಳೆದಕೆಲವು ವರ್ಷಗಳಲ್ಲಿ ಅಲರ್ಜಿಗಳು ಮತ್ತು ಉಸಿರಾಟದ ಕಾಯಿಲೆಗಳು ಹೆಚ್ಚಿರುವುದನ್ನು ವೈದ್ಯರು ಮತ್ತು ನಿವಾಸಿಗಳು ದೃಢಪಡಿಸಿದ್ದಾರೆ ಎಂದು ಕ್ಲೈಮೆಟ್ ಟ್ರೆಂಡ್ಸ್ ಹೇಳಿದೆ.

ವಾರಣಾಸಿಯ ವಾಯು ಗುಣಮಟ್ಟ ಸೂಚ್ಯಂಕ(ಎಕ್ಯೂಐ)ವು 2017ರಲ್ಲಿ 490 ಮತ್ತು ಡಿಸೆಂಬರ್ 2018ರಲ್ಲಿ 384ಕ್ಕೆ ತಲುಪಿತ್ತು ಎಂದು ವರದಿಯು ತಿಳಿಸಿದೆ. ಇವು ಅನುಕ್ರಮವಾಗಿ‘ಅತ್ಯಂತ ಗಂಭೀರ’ ಮತ್ತು ‘ಅತ್ಯಂತ ಕಳಪೆ’ ಮಟ್ಟವನ್ನು ಸೂಚಿಸುತ್ತವೆ.

ಉತ್ತರ ಪ್ರದೇಶದ ಕಾನ್ಪುರವು ವಿಶ್ವದಲ್ಲಿಯೇ ಅತ್ಯಂತ ಮಲಿನ ನಗರವಾಗಿದ್ದು,ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದೆ. ಹರ್ಯಾಣದ ಫರೀದಾಬಾದ್ ಮತ್ತು ವಾರಣಾಸಿ 2 ಮತ್ತು 3ನೇಸ್ಥಾನಗಳಲ್ಲಿವೆ. ನಂತರದ ಸ್ಥಾನಗಳಲ್ಲಿ ಬಿಹಾರದ ಪಾಟ್ನಾ(4) ಮತ್ತು ಗಯಾ(5), ದಿಲ್ಲಿ(6), ಲಕ್ನೋ(7) ಇವೆ. ಆಗ್ರಾ, ಮುಝಫ್ಫರ್‌ಪುರ, ಶ್ರೀನಗರ, ಗುರ್ಗಾಂವ್, ಜೈಪುರ,ಪಟಿಯಾಲಾಮತ್ತು ಜೋಧಪುರ ಇವು ನಂತರದ ಸ್ಥಾನಗಳಲ್ಲಿವೆ.

ಲಕ್ನೋ ಮತ್ತು ಕಾನ್ಪುರದ ಸಂಸದರಾದ ಗೃಹಸಚಿವ ರಾಜನಾಥ ಸಿಂಗ್ ಮತ್ತು ಹಿರಿಯ ಬಿಜೆಪಿ ನಾಯಕ ಮುರಳಿ ಮನೋಹರ ಜೋಶಿ ಅವರು ತಮ್ಮ ಕ್ಷೇತ್ರಗಳಲ್ಲಿಯ ವಾಯುಮಾಲಿನ್ಯ ಸಮಸ್ಯೆಯ ಕುರಿತು ತುಟಿ ಬಿಚ್ಚುತ್ತಿಲ್ಲ ಎಂದೂ ವರದಿಯು ತಿಳಿಸಿದೆ.