ಬಾಲಿವುಡ್ ಹಿರಿಯ ನಟ, ಪದ್ಮಶ್ರೀ ಮನೋಜ್ ಕುಮಾರ್ ನಿಧನ

ಮುಂಬೈ: ಬಾಲಿವುಡ್ ಹಿರಿಯ ನಟ, ಪದ್ಮಶ್ರೀ ಮನೋಜ್ ಕುಮಾರ್ ಮುಂಬೈನಲ್ಲಿ ನಿಧನರಾದರು.

ಮನೋಜ್ ಕುಮಾರ್ (87) ವಯೋಸಹಜ ಕಾಯಿಲೆಯಿಂದ ಬಳಲುತ್ತಿದ್ದರು. ಅವರನ್ನು ಮುಂಬೈನ ಕೋಕಿಲಾಬೆನ್ ಧೀರೂಭಾಯಿ ಅಂಬಾನಿ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿತ್ತು. ಆದರೆ, ಶುಕ್ರವಾರ ಮುಂಜಾನೆ 3:30ಕ್ಕೆ ಅವರು ಚಿಕಿತ್ಸೆ ಫಲಿಸದೆ ಮೃತಪಟ್ಟಿದ್ದಾರೆ.

ದೇಶಭಕ್ತಿಯ ಚಲನಚಿತ್ರಗಳಿಗೆ ಹೆಸರುವಾಸಿಯಾಗಿದ್ದ ಅವರನ್ನು ಅಭಿಮಾನಿಗಳು 'ಭರತ್ ಕುಮಾರ್' ಎಂದು ಕರೆಯುತ್ತಿದ್ದರು. ಉಪಕಾರ್(1967), ಪುರಬ್ ಔರ್ ಪಶ್ಚಿಮ್(1970) ಕ್ರಾಂತಿ (1981) ಚಲನಚಿತ್ರಗಳಿಗೆ ಅವರು ಹೆಸರುವಾಸಿಯಾಗಿದ್ದರು.

ಮನೋಜ್ ಕುಮಾರ್ ಅವರಿಗೆ 1992ರಲ್ಲಿ ಪದ್ಮಶ್ರೀ ಪ್ರಶಸ್ತಿ, 1999ರಲ್ಲಿ ಫಿಲ್ಮ್‌ಫೇರ್ ಜೀವಮಾನ ಸಾಧನೆ ಪ್ರಶಸ್ತಿ ಮತ್ತು 2015ರಲ್ಲಿ ದಾದಾಸಾಹೇಬ್ ಫಾಲ್ಕೆ ಪ್ರಶಸ್ತಿಯನ್ನು ನೀಡಲಾಯಿತು.