ʼಪ್ರಾಣ ಪ್ರತಿಷ್ಠಾಪನೆʼ ದಿನ ಮಾಂಸಾಹಾರ ಪೂರೈಸದಂತೆ ಸ್ವಿಗ್ಗಿ, ಝೊಮೆಟೊಗೆ ಸೂಚಿಸಿದ್ದ ಬಿಜೆಪಿ ಆಡಳಿತದ ರಾಜ್ಯಗಳು

ಹೊಸದಿಲ್ಲಿ: ಅಯೋಧ್ಯೆಯಲ್ಲಿ ನಡೆಯುವ ರಾಮ ಮಂದಿರ ಉದ್ಘಾಟನೆ ದಿನದಂದು ಮಾಂಸಾಹಾರವನ್ನು ಪೂರೈಸದಂತೆ ಭಾರತೀಯ ಜನತಾ ಪಕ್ಷ ಆಡಳಿತಾರೂಢ ರಾಜ್ಯಗಳಾದ ಉತ್ತರ ಪ್ರದೇಶ, ಅಸ್ಸಾಂ, ಛತ್ತೀಸ್‌ಗಢ, ಮಧ್ಯಪ್ರದೇಶ ಹಾಗೂ ರಾಜಸ್ಥಾನ ರಾಜ್ಯಗಳು ಸ್ವಿಗ್ಗಿ, ಝೊಮೆಟೊ ಆಹಾರ ಸರಬರಾಜು ಕಂಪನಿಗೆ ಸೂಚಿಸಿದ್ದವು ಎಂದು ವರದಿಯಾಗಿದೆ.

ಸರಕಾರದ ಈ ಆದೇಶವನ್ನು ಝೊಮೆಟೊ ಪಾಲಿಸಿರುವುದರಿಂದ, ಸರಕಾರವು ಜನಸಾಮಾನ್ಯರ ಆಹಾರ ಆಯ್ಕೆಯನ್ನು ನಿರ್ದೇಶಿಸುತ್ತಿದೆ ಎಂಬ ಟೀಕೆಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ವ್ಯಕ್ತವಾಗಿವೆ.

ವಿವಿಧ ಬಿಜೆಪಿ ಆಡಳಿತಾರೂಢ ರಾಜ್ಯಗಳಲ್ಲಿ ಸೋಮವಾರ ಮದ್ಯ ಹಾಗೂ ಮಾಂಸ ಮಾರಾಟವನ್ನು ನಿಷೇಧಿಸಲಾಗಿದ್ದು, ಮಾಂಸದಂಗಡಿಗಳನ್ನೂ ಮುಚ್ಚಿಸಲಾಗಿದೆ.

ಈ ನಡೆಗೆ ಪ್ರತಿಯಾಗಿ ಬಹುಸಂಖ್ಯಾತತ್ವ ಭಾವನೆಗಳ ಕಾರಣಕ್ಕೆ ಸರಕಾರವು ಪ್ರಜೆಗಳ ಆಹಾರ ಆಯ್ಕೆಯ ಹಕ್ಕನ್ನು ನಿರ್ಬಂಧಿಸುತ್ತಿದೆ ಹಲವಾರು ಸಾಮಾಜಿಕ ಮಾಧ್ಯಮ ಬಳಕೆದಾರರು ಆಕ್ಷೇಪಿಸಿದ್ದಾರೆ.

ಆಹಾರ ವಿತರಣಾ ವೇದಿಕೆ ಸ್ವಿಗ್ಗಿ ತನ್ನ ಪ್ಲಾಟ್‌ಫಾರ್ಮ್‌ನಲ್ಲಿ ಈ ಹಿಂದೆ ರೆಸ್ಟೋರೆಂಟ್‌ಗಳಿಗೆ ತಿಳಿಸಿದ್ದು, ರಾಮ ಮಂದಿರದ ಆಚರಣೆಯ ಆಚರಣೆಗಾಗಿ ಉತ್ತರ ಪ್ರದೇಶ ಸರಕಾರವು ಸೋಮವಾರ ಮಾಂಸ, ಮೀನು ಮತ್ತು ಮದ್ಯ ಮಾರಾಟವನ್ನು ರಾಜ್ಯಾದ್ಯಂತ ನಿಷೇಧಿಸಿತ್ತು ಎಂದು ದಿ. ಎಕನಾಮಿಕ್ ಟೈಮ್ಸ್ ವರದಿ ಮಾಡಿದೆ.

"ಈ ಆದೇಶಕ್ಕೆ ಅನುಸಾರವಾಗಿ, ಸ್ವಿಗ್ಗಿ ನಿಮ್ಮ ಮೆನುವಿನಲ್ಲಿರುವ ಎಲ್ಲಾ ಮಾಂಸಾಹಾರಿ ಆಹಾರಗಳನ್ನು ಜನವರಿ 22 ರಂದು ಸ್ವಿಚ್ ಆಫ್ ಮಾಡುತ್ತದೆ. ಈ ಐಟಂಗಳನ್ನು ಜನವರಿ 23 ರಂದು ಮತ್ತೆ ಆನ್ ಮಾಡಲಾಗುತ್ತದೆ" ಎಂದು ಸಂದೇಶದಲ್ಲಿ ತಿಳಿಸಲಾಗಿತ್ತು.

ಮಹಾರಾಷ್ಟ್ರದಲ್ಲಿ ಮಾಂಸ ಮಾರಾಟವನ್ನು ನಿಷೇಧಿಸದಿದ್ದರೂ, ಥಾಣೆ ಜಿಲ್ಲೆಯ ಭೀವಂಡಿ ನಿಜಾಂಪುರ್ ಸಿಟಿ ಮುನ್ಸಿಪಲ್ ಕಾರ್ಪೊರೇಷನ್ ಕೋಳಿ, ಕುರಿಮರಿ ಮತ್ತು ಮೀನುಗಳನ್ನು ಮಾರಾಟ ಮಾಡುವ ಅಂಗಡಿಗಳನ್ನು ಸೋಮವಾರ ಮುಚ್ಚುವಂತೆ ಹೇಳಿತ್ತು.