ರೂಪದರ್ಶಿ ತಾನ್ಯಾ ಸಿಂಗ್ ಆತ್ಮಹತ್ಯೆ ಪ್ರಕರಣ: ಸನ್ ರೈಸರ್ಸ್ ಕ್ರಿಕೆಟಿಗನ ವಿಚಾರಣೆ ಸಾಧ್ಯತೆ

ಹೊಸದಿಲ್ಲಿ: ರೂಪದರ್ಶಿ ತಾನ್ಯಾ ಸಿಂಗ್ (28) ಅವರ ಆತ್ಮಹತ್ಯೆ ಪ್ರಕರಣದ ತನಿಖೆ ನಡೆಸುತ್ತಿರುವ ಪೊಲೀಸರು ಆಕೆಗೂ ಐಪಿಎಲ್ ಸನ್ ರೈಸರ್ಸ್ ಹೈದರಾಬಾದ್ ತಂಡದ ಕ್ರಿಕೆಟಿಗ ಅಭಿಷೇಕ್ ಶರ್ಮ ಅವರಿಗೂ ಇದ್ದ ಗೆಳೆತನದ ಸುಳಿವು ಸಿಕ್ಕಿದ್ದು ಪೊಲೀಸರು ಸದ್ಯದಲ್ಲಿಯೇ ಶರ್ಮ ಅವರಿಗೆ ವಿಚಾರಣೆಗೆ ಹಾಜರಾಗಲು ನೋಟಿಸ್ ಕಳಿಸುವ ಉದ್ದೇಶ ಹೊಂದಿದ್ದಾರೆ.

ತಾನ್ಯಾ ಅವರು ಶರ್ಮ ಅವರಿಗೆ ಕಳುಹಿಸಿದ ವಾಟ್ಸ್ಯಾಪ್ ಸಂದೇಶ ಹಾಗೂ ಅದಕ್ಕೆ ಶರ್ಮ ಅವರು ಪ್ರತಿಕ್ರಿಯಿಸದೇ ಇರುವುದು ತನಿಖೆ ವೇಳೆ ಪೊಲೀಸರಿಗೆ ತಿಳಿದು ಬಂದಿದೆ.‌

“ಅಭಿಷೇಕ್ ಶರ್ಮ ಹಾಗೂ ತಾನ್ಯಾ ನಡುವೆ ಗೆಳೆತನವಿತ್ತು ಎಂಬಷ್ಟೇ ತಿಳಿದು ಬಂದಿದೆ. ಹೆಚ್ಚಿನ ವಿವರಗಳು ತನಿಖೆಯ ನಂತರ ತಿಳಿದು ಬರಲಿವೆ,” ಎಂದು ಎಸಿಪಿ ಮಲ್ಹೋತ್ರ ತಿಳಿಸಿದ್ದಾರೆ.

                                                (Photo source: Twitter)

ಶರ್ಮ ಅವರು ತಾನ್ಯಾ ಅವರ ಸಂದೇಶಕ್ಕೆ ಏಕೆ ಉತ್ತರಿಸಿಲ್ಲ ಹಾಗೂ ಅವರ ನಡುವಿನ ಗೆಳೆತನದ ಸ್ವರೂಪದ ಬಗ್ಗೆ ತಿಳಿದ ನಂತರ ಹೆಚ್ಚಿನ ವಿವರಗಳು ದೊರೆಯುವ ನಿರೀಕ್ಷೆಯಿದೆ.

ವರದಿಗಳ ಪ್ರಕಾರ ಅಭಿಷೇಕ್ ಶರ್ಮ ಅವರು ತಾನ್ಯಾ ಅವರ ಫೋನ್ ಸಂಖ್ಯೆಯನ್ನು ಬ್ಲಾಕ್ ಮಾಡಿದ್ದರು ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ಆಕೆಯ ಸಂದೇಶಗಳಿಗೆ ಪ್ರತಿಕ್ರಿಯಿಸುತ್ತಿರಲಿಲ್ಲ ಎಂದು ತಿಳಿದು ಬಂದಿದೆ.

ತಾನ್ಯಾ ಸಿಂಗ್ ಅವರ ಮೃತದೇಹ ಸೋಮವಾರ ಬೆಳಿಗ್ಗೆ ಆಕೆಯ ಸೂರತ್ ನಿವಾಸದಲ್ಲಿ ಪತ್ತೆಯಾಗಿತ್ತು. ಆಕೆಯ ತಂದೆ ಭನ್ವರ್ ಸಿಂಗ್ ಆಕೆಯನ್ನು ಬೆಳಿಗ್ಗೆ ಎಬ್ಬಿಸಲು ಹೋದಾಗ ಆಕೆಯ ಮೃತದೇಹ ಅವರಿಗೆ ಕಂಡುಬಂದಿತ್ತು. ಆಕೆ ತನ್ನ ಹೆತ್ತವರೊಂದಿಗೆ ವಾಸಿಸುತ್ತಿದ್ದರು ಹಾಗೂ ಫ್ಯಾಷನ್ ಡಿಸೈನರ್ ಕೂಡ ಆಗಿದ್ದರು.